Kryeministri i Shqipërisë, Edi Rama njoftoi arritjen e disa marrëveshjeve të rëndësishme me Hungarinë gjatë vizitë në Budapest ku u takua me homologun e tij, Viktor Orban.

Kreu i qeverisë shqiptare duke e cilësuar Hungarinë “historikisht një mbështetëse e palëkundur” për integrimin e Shqipërisë në BE, thekson se marrëveshjet kanë t bëjmë me bashkëpunimin bilateral në ekonomi, shëndetësi dhe arsim.

“Një ditë e veçantë pune me kryeministrin Viktor Orban dhe delegacionet përkatëse, mbi bashkëpunimin bilateral në ekonomi, shëndetësi, arsim dhe për ecurinë e integrimit evropian të Shqipërisë, ku Hungaria është historikisht një mbështetëse e palëkundur”, shprehet z. Rama.

Kryeministri i Hungarisë, z. Orban thotë se përkrahin integrimin e Shqipërisë në BE dhe se perspektiva e vendeve të Ballkanit Perëndimor sipas tij është garanci për qëndrueshmëri politike dhe ekonomike.

Kryeministri i Shqipërisë, Edi Rama ka kërkuar që bashkëpunimi mes dy vendeve të forcohet më tej, duke u shprehur i gatshëm për të forcuar jo vetëm lidhjet ekonomike për edhe ato kulturore dhe arsimore.

Ndërsa ministrja e Shëndetësisë, Orgerta Manastirliu specifikoi se gjatë takimit me Miklos Kasler, ministrin për Kapacitetet Njerëzore të Hungarisë, ka diskutuar mbi masat për përballimin e pandemisë si dhe ecurinë e programeve të vaksinimit kundër COVID-19.

“Dakordësuam për thellimin e bashkëpunimit mes dy vendeve në sektorin e shëndetësisë,  duke filluar nga ndarja e praktikave më të mira të programeve të parandalimit dhe kontrollit të sëmundjeve jo të transmetueshme dhe bashkëpunimit me institucionet e kërkimit shkencor”, shprehet znj. Manastirliu.